早幾日見到老爸,佢好似發現新大陸咁話我知「原來孖B鍾意食鵪鶉蛋!我烚幾隻,佢地食晒!」
我沒好氣,「爸,其實我都好鍾意食鵪鶉蛋咖!不過我細個你唔俾我食,話鵪鶉蛋膽固醇高,唔健康之嘛!」
老爸馬上繼續同孖B玩,扮聽唔到。
我一家都是好蛋之徒,無論大人、小朋友,甚至工人姐姐,都每日起碼一隻蛋或以上。小時侯特別愛吃鵪鶉蛋,細細粒好可愛,蛋黃多過蛋白,無論白烚或任何煮法都好味。
無奈坊間流傳話鵪鶉蛋含有高膽固醇,仲高過雞蛋,食幾粒已經膽固醇超標,應儘量少吃云云。
長大後唔忿氣,上網搜尋鵪鶉蛋的營養,發現無論新鮮的雞蛋、鴨蛋、鵪鶉蛋,以100克來計,營養價值都是差不多。一隻中型蛋約50克,約7克蛋白質,含70卡路里;而一隻鵪鶉蛋,約10克,1.3克蛋白質,含16卡路里。* 計落,其實咪差唔多,食5隻鵪鶉蛋等於一隻雞蛋。
至於膽固醇,美國於2015年已經取消了每天膽固醇攝取上限,而且蛋的營養價值豐富,我成日都話,想健康的朋友,戒油鹽糖,戒咩都好,儘量唔好戒蛋,因為實在體積少少,營養俱全。(素食人士和對蛋敏感的朋友除外)
*資料來源:食物安全中心
Annie Lee-香港營養師學會 (HKNS) 認可營養師
家有三寶,一囡和一對龍鳳胎
任職營養師主管多年,生Bsss後轉為私人執業營養師。
身兼多職,撰寫多個健康專欄,舉辦健康講座,為人客提供飲食營養建議,喜歡分享貼地的母嬰和育兒的經驗及營養資訊。
Facebook Page: https://www.facebook.com/AnnieLeeDiet/
更多營養師 Annie Lee的Blog:http://bit.ly/2v3H7zR