最近呢一年同多左好多觀眾接觸,發現原來我喺大家心裡面嘅形象都係「教煮餸嗰個」,「好正經」或者「好似好文靜」;傾多幾句之後就會收到「同平時螢幕上嘅你唔同」,「估唔到你都幾活潑」之類嘅Feedback。就係因為咁,我決定左要開個 Blog,俾大家多啲睇到我唔同嘅一面。其實我興趣超多,真係唔係淨係識煮餸㗎~
第一次寫,等我同大家簡單介紹下我平時會喺邊到出沒啦~無錯,就係我地嘅 DayDayCook Concept Studio 所在地,太平山街!呢個香港人默認嘅放假好去處就係我返工嘅地方,附近都有好多餐廳同 Cafe,仲有幾間獨立時裝店,得閒嚟 Hea 下都真係唔錯!(個人超推薦*茶家同*辦館呢兩間 Cafe!!!)偶爾我自己都鐘意喺到兜個圈影下相,壁畫、斜路、小店、樓梯...全部都係頂級背景,唔錯唔錯。啊,最近仲有勁多 Pokémon 喺附近出沒,好似話港島呢頭特別多,地圖上面明明指住我地 Studio 係其中一個 PokéStop,但張圖就影住對面店...唔知會唔會有一日我地 Studio 都會出現喺 Pokémon Go 上面呢?!